Xaçmaz rayonunda Dini Qurumlarala İş Üzrə Dövlət Komitəsinin dəstəyi Xaçmaz rayon İcra Hakimiyyətinin təşkilatçılığı ilə "Dini maarifçilik işinin təşkili: təcrübə və yeni yanaşma mövzusunda" konfrans keçirilmişdir.
Dekabrın 14-də Xaçmaz rayon İcra Hakimiyyətinin və Dini Qurumlarla İş üzrə Dövlət Komitəsinin birgə təşkilatçılığı ilə “Dini maarifçilik işinin təşkili: təcrübə və yeni yanaşma” mövzusunda konfrans keçirilib.
Tədbirdə ümumtəhsil məktəblərinin təlim-tərbiyə işləri üzrə direktor müavinləri, məktəb psixoloqları, “Həyat bilgisi” fənnini tədris edən müəllimlər, şagirdlər, eləcə də rayonun fəal gəncləri iştirak ediblər.Tədbir Xaçmaz Rayon Tarix-Diyarşünaslıq Muzeyində reallaşdırılıb.
Konfransda çıxış edən Xaçmaz RİH Başçısının müavini İlhamə Nəzərova rayondakı mövcud dini durum barədə məlumat verib. Natiq “İslam Həmrəyliyi İli” çərçivəsində bölgədə həyata keçirilmiş tədbirlərin əhəmiyyətindən danışıb. Qeyd edib ki, müsəlman aləmində baş verən proseslər İslam həmrəyliyini zəruri edir. Dini Qurumlarla İş üzrə Dövlət Komitəsinin sədr müavini Gündüz İsmayılov Prezident İlham Əliyevin Sərəncamı ilə 2017-ci ilin Azərbaycanda “İslam Həmrəyliyi İli” elan edilməsinin İslam dünyasının həmrəyliyinə verilən böyük önəmin göstəricisi olduğunu bildirib. Qeyd edib ki, ölkəmizdəki tolerantlıq mühiti dünyaya nümunədir. Respublikamızda nə dini, nə də milli və irqi ayrı-seçkilik müşahidə edilir. Dövlət Komitəsi tərəfindən maarifləndirmə məqsədilə rayon və şəhərlərdə mütəmadi olaraq “dəyirmi masa”ların və konfransların keçirildiyini diqqətə çatdıran Dövlət Komitəsinin sədr müavini bildirib ki, bu tədbirlərin keçirilməsi dövlət-din münasibətlərinin, İslam həmrəyliyinin, ölkəmizin tolerantlıq ənənələrinin qorunması və daha da inkişaf etdirilməsi məqsədi daşıyır. İdeoloji müstəvidə din sahəsində mövcud olan problemlərdən biri də dini kimliyimizin milli kimliyimizə qarşı qoyulmasıdır. "Dini kimlik" dedikdə İslam, "milli kimlik" dedikdə isə Azərbaycançılıq nəzərdə tutulduğunu deyən sədr müavini təəssüflə qeyd edib ki, bəzi dini qruplar məqsədli şəkildə "dini kimliyimiz"lə "milli kimliyimizi" qarşı-qarşıya qoyurlar.
Daha sonra çıxış edən Dövlət Komitəsinin Dini maarifləndirmə işinin təşkili şöbəsinin müdir müavini Ruslan Əsgərov dini radikalizmin müasir dövrün ən böyük problemlərindən biri olduğunu vurğulayıb. Onunla mübarizədə maarifçilik işinin təşkilinə xüsusi önəm verilməsinin vacibliyini diqqətə çatdırıb.
Konfrans qarşılıqlı müzakirələrlə başa çatdırılıb.
