8 Mart - Beynəlxalq Qadınlar Günü münasibətilə Xaçmaz rayonunda bayram tədbiri təşkil olunub.
Xaçmaz rayon İcra Hakimiyyətinin təşkilatçılığı ilə Heydər Əliyev Mərkəzində gerçəkləşən tədbirdə Xaçmaz rayon İcra Hakimiyyəti başçısı Şəmsəddin Xanbabayev, Xaçmaz RİH başçısı Aparatının məsul əməkdaşları, rayonun idarə, müəssisə və təşkilat rəhbərləri, rayonun ictimai-siyasi və mədəni həyatında fəallığı ilə seçilən qadınlar iştirak ediblər.Tədbir ilk öncə rayonun ictimai-siyasi həyatında fəaliyyətləri ilə seçilən qadınların Ulu Öndərin xatirəsinə ucaldılmış abidənin ziyarəti ilə başlanıb. Abidənin önünə gül dəstələri qoyulub.
Tədbirdə çıxış edən Xaçmaz rayon İcra Hakimiyyəti başçısının birinci müavini İlhamə Nəzərova 8 Mart - Beynəlxalq Qadınlar Günü münasibətilə qadınları rayon rəhbərliyi adından təbrik edərək, qadınlarımıza xoş və səmimi arzularını bildirib. İlhamə Nəzərova qeyd edib ki, Azərbaycan qadını öz zəkası, müdrikliyi, sədaqəti, qəhrəmanlığı, vəfası, yüksək analıq keyfiyyəti ilə hər zaman xalqımızın adını uca tutub. Dünya mədəniyyəti xəzinəsinə nadir incilər bəxş etmiş xalqımızın mənəvi dəyərlərinin formalaşmasında və inkişafında qadınlarımızın böyük rolu olub. Eyni zamanda, Azərbaycan qadınları tariximizin bütün dövrlərində xalqımızın taleyüklü məsələlərinin həll edilməsinə öz sanballı töhfələrini veriblər. O cümlədən natiq bildirib ki, Azərbaycan qadınının həm ailədə, həm işdə, həm də cəmiyyətdəki layiqli mövqeyi dövlətimizin uğurlu, xoşbəxt sabahına, xalqımızın firavanlığına ən ciddi təminatlardan biridir. Respublikamızda bərqərar olan demokratik mühit ölkə qadınlarının zəngin potensialının gerçəkləşdirilməsi üçün əlverişli zəmin yaradır. Azərbaycan dövlətinin qadınlarla bağlı həyata keçirdiyi siyasət hər cür ayrı-seçkiliyi aradan qaldıraraq qadınların bərabər hüquqlarını və imkanlarını təmin etməyə yönəlib. Bu siyasət daimi və dönməz səciyyə daşımaqla bütövlükdə qadınların cəmiyyətdə layiqli mövqeyini hər zaman qoruyub imkan verəcək. Eyni zamanda ölkədə fəaliyyətləri ilə seçilən bir qrup qadının Prezident İlham Əliyevin sərəncamına əsasən “Tərəqqi” medalı ilə təltif edilməsi qadınların bayramında xüsusi ovqat yaratdı. Sərəncama əsasən, rayonun ictimai həyatında səmərəli fəaliyyətinə görə Sədullayeva Sevinc Nəriman qızı “Tərəqqi” medalı ilə təltif edilb. “Tərəqqi” medalı böyük sevinclə Xaçmaz rayon İcra Hakimiyyəti başçısı Şəmsəddin Xanbabayev tərəfindən Sədullayeva Sevinc Nəriman qızına təqdim edilib. Sədullayeva Sevinc çıxış edərək ölkə Prezidentinə qadınlara göstərdiyi diqqətə görə təşəkkür bildirmişdir.
Bayram tədbirində rayonun ictimai-siyasi və mədəni həyatında səmərəli fəaliyyətinə görə fərqlənən bir qrup qadın Fəxri fərman və hədiyyələr ilə təltif olunublar.
Daha sonra tədbir bayram konserti ilə davam etdirilmişdir.
Tədbir bədii hissə ilə davam etdirilib, 115 nömrəli tam orta məktəbin şagirdləri tərəfindən “Sən kimsən Azərbaycan qadını”, əsgərlər kompozisiyası, dahi Nizami Gəncəvinin “Yeddi gözəl” əsərindən maraqlı səhnəciklər nümayiş etdirilib.
Tədbirin sonunda xalq artistləri Nəzakət Teymurova və Samir Cəfərovun ifalarında ana haqqında mahnılar səsləndirilib, tədbirdə iştirak edən qadınlara güllər hədiyyə edilib.
