Qaracik Zeyid kəndində səyyar qəbul keçirilib

Xaçmaz Rayon İcra Hakimiyyətinin başçısı Elnur Rzayev, yerli hüquq mühafizə orqanlarının rəhbərləri və xidmət təşkilatlarının məsul şəxsləri ilə birlikdə Aşağı Zeyid İnzibati Ərazi Dairəsinə daxil olan Qaracik Zeyid kəndində səyyar qəbul keçirib.

Qəbulda Qaracik Zeyid kəndi ilə yanaşı Aşağı Zeyid, Çılğır, Qaraçaycek, Alıcqışlaq, Qaracik, Qədmalıqışlaq və Şıxhaput kəndlərinin sakinləri iştirak edib.

Görüş iştirakçıları əvvəlcə şəhidlərimizin əziz xatirəsini bir dəqiqəlik sükutla yad edib.

Daha sonra vətəndaşların müraciət və təklifləri dinlənilib. Sakinlər elektrik təsərrüfatının yenilənməsi, məktəb təmiri, suvarma suyu ilə təchizat, rabitə və internetlə bağlı müraciətlər səsləndiriblər.

Rayon İcra Hakimiyyətinin başçısı Elnur Rzayev kənd sakinlərinin arzu və təkliflərini həssaslıqla dinləyərək, onları narahat edən problemlərin aradan qaldırılması istiqamətində müvafiq tapşırıqlarını verib. Bir çox müraciətlər yerindəcə həll edilib.

Sakinlər əhalinin problemlərinin həll edilməsi məqsədilə yerlərdə həyata keçirilən tədbirlərə, göstərilən yüksək diqqət və qayğıya görə Azərbaycan Respublikasının Prezidenti İlham Əliyev və Birinci vitse-prezident Mehriban Əliyevaya minnətdarlıqlarını ifadə ediblər.

Sonda Vətən müharibəsi iştirakçılarına təltif olunduqları medallar təqdim olunub.