Qudyalçay üzərində yeni körpünün inşası sürətlə davam etdirilir
Gəndob-Xaçmaz-Yalama avtomobil yolunun 27-ci kilometrliyində, Qudyalçay üzərində yerləşən körpünün inşası istiqamətində işlər sürətlə davam etdirilir. Körpünün qısa zamanda istifadəyə verilməsi üçün əraziyə xeyli sayda texnika və canlı qüvvə cəlb olunub. İkiaşırımlı yeni körpünün uzunluğu 66, eni isə 15 metr olacaq. Körpüdə piyadalar üçün hərəkət zolağı da nəzərdə tutulub.
Xaçmaz Rayon İcra Hakimiyyətinin başçısı Elnur Rzayev, Azərbaycan Avtomobil Yolları Dövlət Agentliyinin məsul şəxsləri ilə birlikdə növbəti dəfə işlərin gedişi ilə maraqlanıb, tikintinin keyfiyyətlə yetirilməsi üçün müvafiq tövsiyyələrini verib.
Qudyalçay üzərində vətəndaşların rahat hərəkətini təmin etmək üçün yeni alternativ yol da çəkilir. Bunun üçün çayın məcrası dəyişdirilib, yeni su ötürücülər qoyulub. Hazırda son tamamlanma işləri görülür.
Elnur Rzayev Qudyalçay üzərində yeni salınan alternativ yola baxış keçirib, hərəkətin təhlükəsiz təşkili üçün tapşırıqlarını verib.
Qeyd edək ki, hazırda sakinlər rayonun Qımılqışlaq kəndindən keçən alternativ yoldan istifadə edirlər. Həmin yolda lazımı təhlükəsizlik tədbirləri görülüb və məlumatlandırıcı yol nişanları qoyulub.
